kabhī kabhī tirī chāhat pe ye gumāñ guzrā
ki jaise sar se sitāroñ kā sā.ebāñ guzrā
charāġh aise jalā kar bujhā gayā koī
tamām diid kā aalam dhuāñ dhuāñ guzrā
junūn-e-shauq meñ sajdoñ kī aabrū bhī ga.ī
mujhe ḳhabar na huī kab vo āstāñ guzrā
vo merā vahm-e-nazar thā ki terā aks-e-jamīl
vo kaun thā ki jo manzar ke darmiyāñ guzrā
bichhaḌ ke shaam rahī tūl-e-umr tak goyā
Thahar gayā thā jo lamha vo phir kahāñ guzrā
mujhe to chashm-e-gurezāñ bhī iltifāt lagī
tire sitam pe bhī īsār kā gumāñ guzrā
chhupā ke so ga.ī muñh din meñ rahguzār-e-firāq
jo shab huī to ḳhayāloñ kā kārvāñ guzrā