dil mirā pā.emāl karte haiñ
aap bhī bas kamāl karte haiñ
baat hotī hai aap kī lekin
log mujh se savāl karte haiñ
mai-kade ke faqīr ai saaqī
kab kisī se savāl karte haiñ
dil kā kyā ġham hameñ mohabbat meñ
dil kī vo dekh-bhāl karte haiñ
mujh ko kahte haiñ log dīvāna
aap nāhaq ḳhayāl karte haiñ
choT lagtī hai dil pe ai hamdam
jab vatan kā ḳhayāl karte haiñ
shukr kar shukr kar ki vo 'maikash'
tujh ko apnā ḳhayāl karte haiñ