tazkira dil kā baar baar na kar
husn ko husn-e-sharmsār na kar
lutf-e-nazzāra-e-bahār uThā
sharh ajzā-e-barg-o-bār na kar
qad-o-gesū ko dād-e-ishrat de
fikr-e-ādāb-e-gīr-o-dār na kar
baḌh ke sāġhar uThā jo piinā hai
izn-e-sāqī kā intizār na kar
shauq kī raushnī meñ baḌhtā jā
kuchh ḳhayāl-e-ma.āl-e-kār na kar
din jo guzreñ baġhair-e-shāhid-o-jām
zindagī meñ unheñ shumār na kar
zer-e-dīvār-e-mai-kada 'maikash'
ḳhauf-e-āshob-e-rozgār na kar