fuġhāñ se zabt-e-junūñ kā nizām TuuT gayā
ki mere haath se merā hī jaam TuuT gayā
vahī haiñ tauq-o-salāsil vahī nizām-e-chaman
vo kaun haiñ jo ye kahte haiñ daam TuuT gayā
zarūr pīr-e-muġhāñ kā bhī kuchh ishāra thā
ġhalat kahā ki muqaddar se jaam TuuT gayā
bikhar ga.e mirī ḳhātir hayāt ke gesū
kabhī jo shab ke sitāroñ kā daam TuuT gayā
kiyā thā jis ne haqā.eq se ham ko begāna
vo ek nashsha-e-kaif-e-davām TuuT gayā
tumhāre qurb kī saa.at meñ yuuñ huā mahsūs
ki jaise silsila-e-sub.h-o-shām TuuT gayā
usūl-e-rāh-numā se jahāñ meñ ai 'maikash'
hazār daam bane ek daam TuuT gayā