ishq kī anjuman kī baat kareñ
phir kisī gul-badan kī baat kareñ
bhuul bhī jaa.eñ tīrgī-e-hayāt
muskurātī kiran kī baat kareñ
is jahāñ se ḳhizāñ kā daur gayā
lahlahāte chaman kī baat kareñ
kyā zarūrī hai jū-e-shīr kī baat
kyuuñ na gañg-o-jaman kī baat kareñ
surḳh āñchal meñ kasmasā.ī huī
sub.h kī is dulhan kī baat kareñ
sāthiyo gaao inqilābī giit
aao dār-o-rasan kī baat kareñ