sukūn-e-qalb o shakeb-e-nazar kī baat karo
guzar ga.ī hai shab-e-ġham sahar kī baat karo
diloñ kā zikr hī kyā hai mileñ mileñ na mileñ
nazar milāo nazar se nazar kī baat karo
shagufta ho na sakegī fazā-e-arz-o-samā
kisī kī jalva-gah-e-bām-o-dar kī baat karo
harīm-e-nāz kī ḳhalvat meñ dastaras hai kise
nazāra-hā-e-sar-e-rah-guzar kī baat karo
badal na jaa.e kahīñ iltifāt-e-husn kā rañg
halāvat-e-nigah-e-muḳhtasar kī baat karo
jahān-e-hosh-o-ḳhirad ke muāmle haiñ darāz
kisī ke gesū-e-āshufta-sar kī baat karo
nigāh-e-nāz hai ik kā.enāt-e-rāz-o-niyāz
jidhar kare vo ishāra udhar kī baat karo
surūr-e-zīst huā jis ke dam-qadam se nasīb
usī nadīm usī ham-safar kī baat karo
vo jis se talḳhī-e-zahrāb-e-ġham gavārā hai
usī 'tabassum'-e-shīrīñ-asar kī baat karo