husn majbūr-e-jafā hai shāyad
ye bhī ik tarz-e-adā hai shāyad
ek ġhamnāk sī aatī hai sadā
koī dil TuuT rahā hai shāyad
ḳhud-farāmosh huā jaatā huuñ
tū mujhe bhuul gayā hai shāyad
in hasīñ chāñd sitāroñ meñ kahīñ
terā naqsh-e-kaf-e-pā hai shāyad
ek duniyā se hue begāne
tujh se milne kā silā hai shāyad
har ghaḌī ashk-fishāñ haiñ āñkheñ
yahī anjām-e-vafā hai shāyad
in laboñ par ye tabassum kī ziyā
shoḳhī-e-baḳht-e-rasā hai shāyad