bahār kaun sī tujh meñ jamāl-e-yār na thī

mushāhida thā tirā sair-e-lāla-zār na thī

mahaktī zulfoñ se ḳhoshe guloñ ke chhūT gire

kuchh aur jaise ki gunjā.ish-e-bahār na thī

ham apne dil hī ko rote the lekin is ke liye

jahāñ meñ kaun sī shai thī jo be-qarār na thī

talāsh ek bahāna thā ḳhaak uḌāne kā

pata chalā ki hameñ justujū-e-yār na thī

jhukā hai qadmoñ meñ tere vo sar ki jis ke liye

koī jagah bhī munāsib sivā.e daar na thī

na jaane 'zeb' dil-e-zār kyuuñ taḌap uTThā

havā-e-sub.h thī ḳhushbū-e-zulf-e-yār na thī