bas ek parda-e-iġhmāz thā kafan us kā
lahūluhān paḌā thā barahna tan us kā
na ye zamīn huī us ke ḳhuun se gulnār
na āsmāñ se utārā gayā kafan us kā
ram-e-najāt bas ik jumbish-e-havā meñ thā
ki naqsh-e-āb ko Thahrā diyā badan us kā
lahakte sho.aloñ meñ go raakh ho chuke aurāq
havā chalī to damakne lagā suḳhan us kā
ghasīTte hue ḳhud ko phiroge 'zeb' kahāñ
chalo ki ḳhaak ko de aa.eñ ye badan us kā