Thahrā vahī nāyāb ki dāman meñ nahīñ thā

jo phuul chunā maiñ ne vo gulshan meñ nahīñ thā

thī mauj lapaktī huī mere hī lahū kī

chehra koī dīvār ke rauzan meñ nahīñ thā

ḳhākistar-e-jāñ ko mirī mahkā.e thā lekin

juuhī kā vo paudā mire āñgan meñ nahīñ thā

āḳhir maiñ hadaf apnā banātā bhī to kis ko

merā koī dushman saf-e-dushman meñ nahīñ thā

chheḌā to bahut sabz havāoñ ne magar 'zeb'

sho.ala hī koī ḳhaak ke ḳhirman meñ nahīñ thā