ham bin ġham-e-yār bhī jiye haiñ
marne ke baḌe jatan kiye haiñ
maḳhfī tujh se bhī haiñ ġham-e-yār
kuchh vaar jo dil ne sah liye haiñ
dil se bhī chhupā ke ham ne rakkhe
kuchh chaak jo umr bhar siye haiñ
kuchh ḳhūn-e-vafā se kuchh hinā se
kyā rañg bahār ne liye haiñ
afsos hamārī saḳht-jānī
ahbāb ne bhī gile kiye haiñ
gulshan meñ ajab havā chalī hai
phūloñ ne hoñT sī liye haiñ
dil-bāḳhtagī o sher-ḳhvānī
do kaam to umr bhar kiye haiñ
kahte the tujhī ko jaan apnī
aur tere baġhair bhī jiye haiñ