purānā qissa tamām karnā paḌegā us ko

na.e taqāzoñ pe kaam karnā paḌegā us ko

vo ḳhalvatoñ meñ agar kisī ko pukārtā hai

to apnā ūñchā maqām karnā paḌegā us ko

agar vo aivān-e-āshiqī se juḌā hai to phir

ḳhud apnā bhī ehtirām karnā paḌegā us ko

sab apnī apnī rivāyatoñ ko bhulā rahe haiñ

kuchh aur rasmoñ ko aam karnā paḌegā us ko

usī kī nigrāniyoñ meñ haiñ ab ye bastiyāñ bhī

yahāñ bhī kuchh din qayām karnā paḌegā us ko

vo chāhtā hai agar bulandī banī rahe to

havā ko apnā ġhulām karnā paḌegā us ko

agar nigāhoñ meñ āfiyat hai to sehn-e-dil meñ

jo kuchh hai ḳhvāboñ ke naam karnā paḌegā us ko

sunā hai 'rāhat' koī qayāmat hai aane vaalī

abhī se kuchh intizām karnā paḌegā us ko