maiñ apne aap se ġhāfil na yuuñ huā hotā

mire bhī paas agar koī aa.inā hotā

zarā tū soch ki itnā hī kar liyā hotā

mujhe kitāb samajh kar hī paḌh liyā hotā

tamām umr faqat ek aarzū hī rahī

kiyā thā pyaar to phir TuuT kar kiyā hotā

ye aur baat ki maiñ tujh se duur huuñ lekin

maiñ tere paas bhī hotā bhalā to kyā hotā

papīhā sāvanoñ meñ yuuñ pukārtā na kabhī

agar tū chāñdnī rātoñ meñ mil gayā hotā

mirī bisāt ke baare meñ pūchhne vaale

kisī faqīr kā chehra hī paḌh liyā hotā

karūñ to kis se karūñ maiñ gila jahālat kā

ye aarzū thī ki maiñ bhī paḌhā likhā hotā