ab ke yaaro barkhā-rut ne manzar kyā dikhlā.e haiñ
jalte bujhte chehre haiñ aur maddham maddham saa.e haiñ
aaj bhī sūraj ke bujhte hī halkī gahrī shaam huī
aaj bhī ham ne tanhā ghar meñ añgāre dahkā.e haiñ
kaun kisī kā dukh-sukh bāñTe kaun kisī kī raah take
chāroñ jānib chalte-phirte ḳhud-ġharzī ke saa.e haiñ
un kī yaad meñ pahroñ ronā apnī yahī bas aadat hai
log bhī kaise dīvāne haiñ hameñ hañsāne aa.e haiñ
ham pyāsoñ ke dil meñ aag lagāne kā hai shauq 'hasan'
yā phir bādal aaj kisī kī zulfeñ chhūne aa.e haiñ