har-sū us kā charchā hone vaalā hai
mausam phir se ujlā hone vaalā hai
bolegā auqāt se baḌh kar vo shāyad
qad se saaya ūñche hone vaalā hai
baat umūman kartā rahtā hai sach kī
jaldī hī vo tanhā hone vaalā hai
naam pe maz.hab ke jamghaT hai logoñ kā
shahr meñ shāyad dañgā hone vaalā hai
ham bhī pahuñcheñ le kar apnī ḳhāmoshī
āvāzoñ kā saudā hone vaalā hai
itnā royā huuñ maiñ us kī yādoñ meñ
saarā paanī khārā hone vaalā hai
hañs ke dekhā hai us ne merī jānib
'shoḳh' maraz ab achchhā hone vaalā hai