ḳhushbū jaise log mile afsāne meñ
ek purānā ḳhat kholā anjāne meñ
shaam ke saa.e bālishtoñ se naape haiñ
chāñd ne kitnī der lagā dī aane meñ
raat guzarte shāyad thoḌā vaqt lage
dhuup unDelo thoḌī sī paimāne meñ
jaane kis kā zikr hai is afsāne meñ
dard maze letā hai jo dohrāne meñ
dil par dastak dene kaun aa niklā hai
kis kī aahaT suntā huuñ vīrāne meñ
ham is moḌ se uTh kar agle moḌ chale
un ko shāyad umr lagegī aane meñ