os paḌī thī raat bahut aur kohra thā garmā.ish par

sailī sī ḳhāmoshī meñ āvāz sunī farmā.ish par

fāsle haiñ bhī aur nahīñ bhī naapā taulā kuchh bhī nahīñ

log ba-zid rahte haiñ phir bhī rishtoñ kī paimā.ish par

muñh moḌā aur dekhā kitnī duur khaḌe the ham donoñ

aap laḌe the ham se bas ik karvaT kī gunjā.ish par

kāġhaz kā ik chāñd lagā kar raat añdherī khiḌkī par

dil meñ kitne ḳhush the apnī furqat kī ārā.ish par

dil kā hujra kitnī baar ujḌā bhī aur basāyā bhī

saarī umr kahāñ Thahrā hai koī ek rihā.ish par

dhuup aur chhāñv baañT ke tum ne āñgan meñ dīvār chunī

kyā itnā āsān hai zinda rahnā is āsā.ish par

shāyad tiin nujūmī merī maut pe aa kar pahuñcheñge

aisā hī ik baar huā thā iisā kī paidā.ish par