vo ḳhat ke purze uḌā rahā thā
havāoñ kā ruḳh dikhā rahā thā
batā.ūñ kaise vo bahtā dariyā
jab aa rahā thā to jā rahā thā
kuchh aur bhī ho gayā numāyāñ
maiñ apnā likkhā miTā rahā thā
dhuāñ dhuāñ ho ga.ī thiiñ āñkheñ
charāġh ko jab bujhā rahā thā
muñDer se jhuk ke chāñd kal bhī
paḌosiyoñ ko jagā rahā thā
usī kā īmāñ badal gayā hai
kabhī jo merā ḳhudā rahā thā
vo ek din ek ajnabī ko
mirī kahānī sunā rahā thā
vo umr kam kar rahā thā merī
maiñ saal apne baḌhā rahā thā
ḳhudā kī shāyad razā ho is meñ
tumhārā jo faisla rahā thā