har gaam zindagī meñ ajab sānehe hue
apne parā.e jāñchne ke tajarbe hue
ik Diary purānī mire haath kyā lagī
yādoñ ke zard peḌ yakāyak hare hue
ai dil sambhāl zabt ki pushte laraz uThe
añkhoñ se bah na jaa.eñ ye dariyā ruke hue
āñkhoñ meñ dekh shahr-e-ḳhamoshāñ kā sā sukūt
palkoñ pe dekh ġham ke fasāne likhe hue
'bilqīs' ik charāġh sar-e-rāh kyā rakhā
bastī ke har makān hī meñ tabsire hue