chalī jo piyā kī galī dhīre dhīre

mirī aañkh kyuuñ nam huī dhīre dhīre

ubhartā gayā mujh meñ vo lamha lamha

maiñ tahlīl hotī ga.ī dhīre dhīre

na baisākhiyoñ kā sahārā liyā hai

maiñ paañv pe chaltī rahī dhīre dhīre

do-pahreñ makānoñ meñ phailī huī haiñ

meñ saa.e sī baḌhtī huī dhīre dhīre

mirā zabt baḌhtā chalā jā rahā hai

maiñ parchhā.īñ maañ kī banī dhīre dhīre

tirī yaad bhī jaise aarī hai koī

mire dil pe chaltī huī dhīre dhīre

havā-e-zamāna muḳhālif thī lekin

maiñ parvāz kartī rahī dhīre dhīre