diye kī lau mirī jānib lapak rahī hai ab
ye baat saare jahāñ ko khaTak rahī hai ab
ye jaan kar ki mire sar se āsmān gayā
zamīn paañv tale se sarak rahī hai ab
jo baat barsoñ talak aa.ine se kartī rahī
vo tujh se kahte gale meñ aTak rahī hai ab
tumhāre va.ade ke sone kā khoT hai dekho
ye mere sar meñ jo chāñdī chamak rahī hai ab
kisī tarah mujhe ḳhud ko sambhālnā hogā
udāsī aañkh se bāhar chhalak rahī hai ab
hamārī aañkh lagī hai ghaḌī kī suuī par
hamārī nabz musalsal phaḌak rahī hai ab