sūkhī zamīñ ko yaad ke bādal bhigo ga.e
palkoñ ko aaj biite hue pal bhigo ga.e
aañsū falak kī aañkh se Tapke tamām raat
aur sub.h tak zamīn kā āñchal bhigo ga.e
maazī ke abr TuuT ke barse kuchh is tarah
muddat se ḳhushk āñkhoñ ke jañgal bhigo ga.e
vaqt-e-safar judā.ī ke lamhāt-e-muzmahil
ik bevafā kī aañkh kā kājal bhigo ga.e
maiñ manzaroñ meñ khoyā huā parbatoñ ke thā
aa kar kisī kī yaad ke bādal bhigo ga.e