anā kī qaid se nikle muqābla to kare
vo merā saath nibhāne kā hausla to kare
kabhī na TūTne vaalā hisār ban jā.ūñ
vo merī zaat meñ rahne kā faisla to kare
use maiñ sauñp duuñ apnī ye muntazir āñkheñ
vo merī khoj meñ jaane kā tazkira to kare
zamāne bhar ko maiñ apnī giraft meñ le luuñ
mirā nasīb mujhe tujh se māvarā to kare
maiñ us ko kho ke adhūrā vo mujh ko pā ke udaas
hamāre karb kā koī muāzna to kare