lutf rahegā ham-nashīñ zāhid bā-vazū bhī hai
aaj ghaTā ke dosh par saaz bhī hai subū bhī hai
pesh-e-nigāh-e-muztarib hāsil-e-justujū bhī hai
ya.anī vo shoḳh mā.il-e-pursish-e-ārzū bhī hai
itr-fashāñ shamīm-e-gul bād-e-sabā latīf-tar
tāza-kun mashām-e-jāñ gesu-e-mushk-bū bhī hai
chañg ba-dast nai-ba-lab mutrib-e-dil-navāz bhī
garm-navā chaman chaman tā.ir-e-ḳhush-gulū bhī hai
tujh pe ye raaz munkashif zāhid-e-ḳhuld-jū kahāñ
hāsil-e-jannat-nazīr ālam-e-rañg-o-bū bhī hai