ishq kā dard-e-be-davā hai ye

jaane terī balā ki kyā hai ye

maar Dālegī ek aalam ko

terī ai shoḳh gar adā hai ye

har dam aatā hai aur hī saj se

kyā hī allāh mīrzā hai ye

chāhiye us kā sharbat-e-dīdār

ki tap-e-ishq kī davā hai ye

us sitam-pesha mehr dushman kī

mere uupar agar jafā hai ye

is meñ us kī to kuchh nahīñ taqsīr

chāhne kī mire sazā hai ye

dil-e-'bedār' ko to luuT liyā

zulf hai yā koī balā hai ye