nashshe meñ jī chāhtā hai bosa-bāzī kījiye

itnī ruḳhsat dījiye banda-navāzī kījiye

chāhiye jo kuchh so ho pahle hī sajde meñ husūl

aap ko gar ka.aba-e-dil kā namāzī kījiye

jis ne ik jalva ko dekhā jī diyā parvāna-vār

is qadar ai sham.a-rūyāñ husn-sāzī kījiye

nardbāñ kahte haiñ hai bām-e-haqīqat kā majāz

chand roz is vāste ishq-e-majāzī kījiye

ḳhvāhish-e-raushan-dilī gar hove shab se tā-sahar

sham.a-sāñ 'bedār' ro ro jāñ-gudāzī kījiye