subuk-sarī meñ bhī andesha-e-havā rakhnā
sulag uThe ho to jalne kā hausla rakhnā
na.ī fazā meñ na.e par nikālne hoñge
falak ko zer-e-zamīñ ko gurez-pā rakhnā
tumhāre jism ke sandal kī aabrū hai bahut
hujūm-e-shauq meñ rah kar bhī fāsla rakhnā
zamīn phuul fazā nuur āsmān dhanak
inhīñ meñ rahnā magar rañg bhī judā rakhnā
tumhāre shahr ke lab-basta shā.iroñ meñ se huuñ
mire liye bhī koī harf-e-be-navā rakhnā
ye zīnateñ bhī ajab haiñ ye sādgī bhī ajab
riyā ke saare hunar jism par sajā rakhnā
na jaane kaun sā kis vaqt kaam aa jaa.e
so ek jeb meñ but ek meñ ḳhudā rakhnā