kuchh us ko yaad karūñ us kā intizār karūñ
bahut sukūt hai maiñ ḳhud ko be-qarār karūñ
bharūñ maiñ rañg na.e muzmahil tamannā meñ
udaas raat ko āsūda-e-bahār karūñ
kuchh aur chaah baḌhā.ūñ kuchh aur dard sahūñ
jo mujh se duur hai yuuñ us ko ham-kanār karūñ
vafā ke naam pe kyā kyā jafā.eñ hotī rahīñ
maiñ har libās-e-jafā aaj taar taar karūñ
vo merī raah meñ kāñTe bichhā.e maiñ lekin
usī ko pyaar karūñ us pe e'tibār karūñ
ye mere ḳhvāb mirī zindagī kā sarmāya
na kyuuñ ye ḳhvāb bhī maiñ aaj nazr-e-yār karūñ