shīsha us kā ajiib hai ḳhud hī
vo hamārā raqīb hai ḳhud hī
jaan kar ham nahīñ lagāte dil
dil se har but qarīb hai ḳhud hī
ham ko hājat nahīñ naqīboñ kī
sher apnā naqīb hai ḳhud hī
koī ham ko salīb kyā degā
fan hamārā salīb hai ḳhud hī
shā.irī koī ḳhud nahīñ manhūs
sher-go bad-nasīb hai ḳhud hī
mulk ko māl-e-vaqf mat jaano
qaum apnī ġharīb hai ḳhud hī
tum sikhāoge 'vāmiq' us ko adab
har parī-vash adiib hai ḳhud hī