nahīñ milte vo ab to kyā baat hai
yahāñ ḳhud se bhī kab mulāqāt he
tire dhyān ke sab ujāle ga.e
bas ab ham haiñ aur dukh bharī raat hai
hamārī taraf bhī kabhī ik nigāh
hameñ bhī bahut nashsha-e-zāt hai
sulagtā huā din jo kaT bhī gayā
to phir aañch detī huī raat hai
shikāyat kisī se to kiyā thī magar
gila ek rasm-e-ḳharābāt hai
nayā dukh to miltā hai kis ko yahāñ
magar ġham kī har shab na.ī raat hai
har ik shaam taaza umīd-e-visāl
har ik roz roz-e-mukāfāt hai