ye terī chaah bhī kyā terī aarzū bhī kyā
hamāre jism meñ ye dauḌtā lahū bhī kyā
hai jis ke dhyān meñ har lamha ḳhvāb kā aalam
mile kahīñ to kareñ us se guftugū bhī kyā
tire ḳhayāl kī ḳhushbū tire jamāl kā rañg
hamāre dasht meñ lekin ye rañg-o-bū bhī kyā
ye taptī ret ye pyāsī zamīñ yahāñ logo
kisī ke pyaar se mahkī huī numū bhī kyā
hazār koh-o-bayābāñ kiye haiñ tai lekin
hue ham ābla-pāyāñ lahū lahū bhī kyā
kisī kī yaad meñ kaT jaa.e zindagī saarī
ik aarzū to hai lekin ye aarzū bhī kyā