mujhe bhī niim ke jaisā na kar de
ki talḳhī ziist kī kaḌvā na kar de
ye terī aarzū aisā na kar de
zamāne meñ mujhe rusvā na kar de
mohabbat zindagī se vo bhī behad
kahīñ ye zindagī dhokā na kar de
tū is se qabl ho āñkhoñ se ojhal
mirā mālik mujhe andhā na kar de
atā kar de ilāhī phir se bachpan
mujhe har fikr se begāna kar de
sajā de din meñ taare shab meñ sūraj
agar vo chāhe to kyā kyā na kar de
siyāsat ke agar bas meñ ho 'gauhar'
mohabbat par bhī vo jurmāna kar de