ḳhafā mat ho mujh ko Thikāne bahut haiñ

mirā sar rahe āstāne bahut haiñ

bahut duur hai apne nazdīk tū bhī

tujhe yaad kāfir bahāne bahut haiñ

bahāne na kar mujh se ai chashm-e-giryāñ

abhī ashk mujh ko bahāne bahut haiñ

mire chashm-o-dil aur jigar sab haiñ hāzir

tū ḳhātir-nishāñ rakh nishāne bahut haiñ

kashish dil kī hī kaam kartī hai varna

fusūñ saiñkaḌoñ haiñ fasāne bahut haiñ

junūñ naqd-e-dāġh-e-jigar māñgtā hai

ye kah do ki ab to ḳhazāne bahut haiñ

bahut kam hai sach is zamāne meñ 'ehsāñ'

yahāñ jhuuT ke kār-ḳhāne bahut haiñ