rafta rafta āsmāñ utrā zamīñ ke us taraf
maiñ ne boyā thā kabhī sabza zamīñ ke us taraf
is zamīñ par pyaas kī shiddat huī thī kab ayaañ
kis ne sochā thā nihāñ dariyā zamīñ ke us taraf
āsmāñ ke rañg saare hairatoñ ke aks haiñ
vo hai ik chehra pas-e-parda zamīñ ke us taraf
mere hone kā gumāñ is bhiiḌ meñ hai mubtalā
aur maiñ tanhā bahut tanhā zamīñ ke us taraf
ek taara TūTne kī chaah meñ bechain hai
muntazir hogā koī bachcha zamīñ ke us taraf