mire vajūd kī gahrā.iyoñ meñ rahtā hai

vo ek shaḳhs jo tanhā.iyoñ meñ rahtā hai

qarīb-e-jāñ vahī aatā hai dastakeñ dene

jo mere jism kī parchhā.iyoñ meñ rahtā hai

mirā makān bhī vahshat-kada banā huā hai

ajab tazād mire bhā.iyoñ meñ rahtā hai

vo jhuuT itnī safā.ī ke saath boltā hai

ki us kā zikr bhī sachchā.iyoñ meñ rahtā hai

ik ishti.āl darūn-e-vajūd-e-insānī

dil-e-figār kī pahnā.iyoñ meñ rahtā hai

malāmat-e-shab-e-hijrāñ ke ba.ad terā 'qamar'

jahāñ bhī jaatā hai rusvā.iyoñ meñ rahtā hai