kabhī sahar to kabhī shaam le gayā mujh se
tumhārā dard ka.ī kaam le gayā mujh se
mujhe ḳhabar na huī aur zamāna jaate hue
nazar bachā ke tirā naam le gayā mujh se
use ziyāda zarūrat thī ghar basāne kī
vo aa ke mere dar-o-bām le gayā mujh se
bhalā kahāñ koī juz is ke milne vaalā thā
bas ek jur.at-e-nākām le gayā mujh se
bas ek lamhe ke sach jhuuT ke evaz 'farhat'
tamām umr kā ilzām le gayā mujh se