be-sabāt sub.h shaam aur mirā vajūd

yahī azaab hai mudām aur mirā vajūd

koī chiiz kam hai mujh meñ bas yahī ḳhayāl

saarā jahān jaise ḳhaam aur mirā vajūd

us kā husn-e-be-amāñ aur mirā huzūr

ek teġh-e-be-niyām aur mirā vajūd

guftugū hī guftugū aur mirā sukūt

ek harf-e-be-kalām aur mirā vajūd

merī hayāt ā.īna-e-hijr-e-mustaqil

ik safar hai be-qayām aur mirā vajūd

maiñ abhī talak visāl-e-āb-o-gil ke biich

jaise marg-e-be-maqām aur mirā vajūd

sho.ala-e-shauq-e-nā-rasā aur ye qaid-e-jism

ik hisār-e-sub.h-o-shām aur mirā vajūd