peḌoñ kī ghanī chhāñv aur chait kī hiddat thī
aur aise bhaTakne meñ anjān sī lazzat thī
in kohna fasīloñ ko pahroñ hī take jaanā
in ḳhālī jharokoñ meñ jaise koī sūrat thī
hairān sī nazroñ meñ ik shakl gurezāñ sī
ik sāya-e-guzrāñ se vo kaisī mohabbat thī
har jumbish-e-lab us kī dastak thī dar-e-dil par
har vaqf-e-ḳhamoshī meñ taqrīr kī lazzat thī
har din ke guzarne meñ har raat ke Dhalne meñ
har chashm-zadan manzil har saañs masāfat thī