kuchh gunah nahīñ is meñ e'tirāf hī kar lo

jo chhupā.e phirte ho sab ke rū-ba-rū kah do

bojh kyuuñ rahe dil par apnī kam-kalāmī kā

buzdilī bhī achchhī hai chāhe tum ye na maano

shab jo ḳhvāb dekhā thā ek dasht-e-ḳhvāhish kā

apnā jī kaḌā kar ke aaj us se kah Daalo

ḳhuub hai sazā ye bhī kasb-e-kāmyābī kī

ek shab kī qīmat meñ ab to umr-bhar jaago

ek baar chhū lenā bas gul-e-badan us kā

ik matā-e-ḳhushbū hai haath umr-bhar chūmo

thā to vo bas ik lamha par ye us kā phailāo

chāhe ishrateñ us kī saarī zindagī likkho

ḳhvāb le ke aayā huuñ maiñ dukān-e-dushman par

is se besh-qīmat ab aur chiiz kyā becho