hijr kī shab meñ qaid kare yā sub.h-e-visāl meñ rakkhe
achchhā maulā terī marzī to jis haal meñ rakkhe
khel ye kaisā khel rahī hai dil se terī mohabbat
ik pal kī sarshārī de aur dinoñ malāl meñ rakkhe
maiñ ne saarī ḳhushbueñ āñchal se bāñdh ke rakkhīñ
shāyad in kā zikr tū apne kisī savāl meñ rakkhe
kis se tere aane kī sargoshī ko sunte hī
maiñ ne kitne phuul chune aur apnī shaal meñ rakkhe
mushkil ban kar TuuT paḌī hai dil par ye tanhā.ī
ab jaane ye kab tak us ko apne jaal meñ rakkhe