kaun bhañvar meñ mallāhoñ se ab takrār karegā
ab to qismat se hī koī dariyā paar karegā
saarā shahr hī tārīkī par yuuñ ḳhāmosh rahā to
kaun charāġh jalāne ke paidā āsār karegā
jab us kā kirdār tumhāre sach kī zad meñ aayā
likhne vaalā shahr kī kaalī har dīvār karegā
jaane kaun sī dhun meñ tere shahr meñ aa nikle haiñ
dil tujh se milne kī ḳhvāhish ab sau baar karegā
dil meñ terā qayām thā lekin ab ye kise ḳhabar thī
dukh bhī apne hone par itnā isrār karegā