vo baat baat meñ itnā badaltā jaatā hai
ki jis tarah koī lahja badaltā jaatā hai
ye aarzū thī ki ham us ke saath saath chaleñ
magar vo shaḳhs to rasta badaltā jaatā hai
ruteñ visāl kī ab ḳhvāb hone vaalī haiñ
ki us kī baat kā lahja badaltā jaatā hai
rahā jo dhuup meñ sar par mire vahī āñchal
havā chalī hai to kitnā badaltā jaatā hai
vo baat kar jise duniyā bhī mo'tabar samjhe
tujhe ḳhabar hai zamāna badaltā jaatā hai