tujh se ab aur mohabbat nahīñ kī jā saktī
ḳhud ko itnī bhī aziyyat nahīñ dī jā saktī
jānte haiñ ki yaqīñ TuuT rahā hai dil par
phir bhī ab tark ye vahshat nahīñ kī jā saktī
habs kā shahr hai aur us meñ kisī bhī sūrat
saañs lene kī sahūlat nahīñ dī jā saktī
raushnī ke liye darvāza khulā rakhnā hai
shab se ab koī ijāzat nahīñ lī jā saktī
ishq ne hijr kā āzār to de rakkhā hai
is se baḌh kar to ri.āyat nahīñ dī jā saktī