ab kis se kaheñ aur kaun sune jo haal tumhāre baad huā
is dil kī jhiil sī āñkhoñ meñ ik ḳhvāb bahut barbād huā
ye hijr-havā bhī dushman hai is naam ke saare rañgoñ kī
vo naam jo mere hoñToñ par ḳhushbū kī tarah ābād huā
us shahr meñ kitne chehre the kuchh yaad nahīñ sab bhuul ga.e
ik shaḳhs kitāboñ jaisā thā vo shaḳhs zabānī yaad huā
vo apne gaañv kī galiyāñ thiiñ dil jin meñ nāchtā gaatā thā
ab is se farq nahīñ paḌtā nāshād huā yā shaad huā
benām satā.ish rahtī thī in gahrī sāñvlī āñkhoñ meñ
aisā to kabhī sochā bhī na thā dil ab jitnā bedād huā