ye dil bhulātā nahīñ hai mohabbateñ us kī
paḌī huī thiiñ mujhe kitnī ādateñ us kī
ye merā saarā safar us kī ḳhushbuoñ meñ kaTā
mujhe to raah dikhātī thiiñ chāhateñ us kī
ghirī huī huuñ maiñ chehroñ kī bhiiḌ meñ lekin
kahīñ nazar nahīñ ātīñ shabāhateñ us kī
maiñ duur hone lagī huuñ to aisā lagtā hai
ki chhāñv jaisī thiiñ mujh par rifāqateñ us kī
ye kis galī meñ ye kis shahr meñ nikal aa.e
kahāñ pe rah ga.iiñ logo sadāqateñ us kī
maiñ bārishoñ meñ judā ho ga.ī huuñ us se magar
ye merā dil mirī sāñseñ amānateñ us kī