ishq karo to ye bhī socho arz-e-savāl se pahle
hijr kī puurī raat aatī hai sub.h-e-visāl se pahle
dil kā kyā hai dil ne kitne manzar dekhe lekin
āñkheñ pāgal ho jaatī haiñ ek ḳhayāl se pahle
kis ne ret uḌaa.ī shab meñ āñkheñ khol ke rakkhīñ
koī misāl to honā us kī misāl se pahle
kār-e-mohabbat ek safar hai is meñ aa jaatā hai
ek zavāl-āsār sā rasta bāb-e-kamāl se pahle
ishq meñ resham jaise vādoñ aur ḳhvāboñ kā rasta
jitnā mumkin ho tai kar leñ gard-e-malāl se pahle