vaañ zerkī pasand na idrāk chāhiye
ijz-o-niyāz-e-dīda-e-namnāk chāhiye
ā.īna ban ki shāhid-o-mash.hūd ek hai
us rū-e-pāk ko nazar-e-pāk chāhiye
sair-o-sulūk-e-jāñ nahīñ be-jazba-e-nihāñ
is raah meñ ye tausan-e-chālāk chāhiye
guzre ummīd-o-bīm se ye hausla kise
rind-e-ḳharāb-o-ārif-e-bebāk chāhiye
har chashma aa.ina hai ruḳh-e-āftāb kā
haañ sat.h-e-āb be-ḳhas-o-ḳhāshāk chāhiye
nash-o-numā-e-sabza-o-gul meñ nahīñ darañg
abr-e-karam ko tishnagī-e-ḳhāk chāhiye
islāh-e-hāl-e-āshiq-e-dil-ḳhasta hai zarūr
ma.ashūq jaur-pesha-o-saffāk chāhiye
jo ain-e-nā-e-nosh ho us bāda-nosh ko
jām-o-subū na ḳhum-kada-o-tāk chāhiye
sayyād ke asar pe ravāñ ho to said hai
vo said hī nahīñ jise fitrāk chāhiye