zarā ġham-zadoñ ke bhī ġham-ḳhvār rahnā

kareñ naaz to nāz-bardār rahnā

farāḳhī-o-usrat meñ shādī-o-ġham meñ

bahar-hāl yāroñ ke tum yaar rahnā

samajh nardbāñ apnī nākāmiyoñ ko

ki hai shart-e-himmat talabgār rahnā

karo shukr hai ye ināyat ḳhudā kī

balāoñ meñ aksar giraftār rahnā

agar aadmī ko na ho mashġhala kuchh

bahisht-e-barīñ meñ ho dushvār rahnā

ḳhabar bhī hai aadam se jannat chhuTTī kyuuñ

ḳhilāf-e-jibillat thā be-kār rahnā

samajhte haiñ sheroñ ko bhī narm chāra

ġhazālān-e-shahrī se hoshyār rahnā