salāmat hai sar to sirhāne bahut haiñ

mujhe dil-lagī ke Thikāne bahut haiñ

jo tashrīf laao to hai kaun maan.e

magar ḳhū-e-bad ko bahāne bahut haiñ

asar kar ga.ī nafs-e-rahzan kī dhamkī

ki yaañ mard kam aur zanāne bahut haiñ

muattal nahīñ baiThte shaġhl vaale

shikār-afganoñ ko nishāne bahut haiñ

karo dil ke vīrāne kī kunj-kāvī

dabe is khañDar meñ ḳhazāne bahut haiñ

na ai sham.a ro ro ke mar shaam hī se

abhī tujh ko aañsū bahāne bahut haiñ

huā merī rūdād par hukm āḳhir

ki mash.hūr aise fasāne bahut haiñ

nahīñ rail yā taar barqī pe mauqūf

chhupe qudratī kār-ḳhāne bahut haiñ

bache kyūñki be-chāra murġh-e-gurasna

ba-kasrat haiñ daam aur daane bahut haiñ

bas ik āstāna hai sajde ke qābil

zamāna meñ go āstāne bahut haiñ