natīja kyūñkar achchhā ho na ho jab tak amal achchhā
nahīñ boyā hai tuḳhm achchhā to kab pāoge phal achchhā
karo mat āj-kal hazrat burā.ī ko abhī chhoḌo
nahīñ jo kaam achchhā vo na aaj achchhā na kal achchhā
bure ko tag bhī karne aur tavaqqo nek-nāmī kī
dimāġh apnā sañvāro tum nahīñ hai ye ḳhalal achchhā
jo ho jaa.e ḳhatā koī ki āḳhir aadmī ho tum
to jitnā jald mumkin ho karo us kā badal achchhā
kare jo paañv bad-rāhī to sonā us kā behtar hai
na ho jis haath se nekī to aisā haath shal achchhā